Tuesday, January 20, 2009

Шүнгүй лам, Шүншиггүй бурхан

Энэ үгийг Энэтхэгийн хойд хэсгийн Варанаси хотоос Мумбай явах галт тэргэнд тааралдсан лам ах хэлж билээ. Нийт 10 хоногт 5000 орчим километр тэнэсэн аялал маань өндөрлөж гэрийн бараа харахаар дөхөж явсан царай маань тэр. Жилдээ ганц удаа ном, компьютер хоёроос тархиа салгаж өөр ертөнц үзэж байх зорилгоо гурав дахь жилдээ биелүүлж Бурхан багшийн ариун дагшин газар хэмээгдэх дөрвөн ч газраар 10 хоногийн дотор тойрлоо. Энэ тухай дараа өгүүлэх болно хэмээгээд харин замын хань болж явсан ах ламын хэлсэн энэхүү өвөрмөц хэлцийн талаар тайлбарлавал:

Ах хүү өөрөө миний өмнө нь бичиж байсан Гоманг хэмээх газар Чойрын ном үздэг. Чойр гэдэг нь миний ойлгож буйгаар бол Буддын шашны цөм нь болох философи, гүн ухааны номлол ажээ. Дрэпүн Гоманг дацан өмнө нь Төвдөд үйл ажиллагаагаа явуулдаг байсан хамгийн том гүн ухааны сургууль байж байгаад Төвдүүд Хятадад эзлэгдсэнээс хойш үйл ажиллагаа нь хумигдсан ажээ. Харин Энэтхэгт цагаачилж ирсэн Далай лам бурхны шашны гүн ухааны сургаалийг хойч үедээ залгамжлуулахаар Карнатака мужид Төвдийн цагаачдын районд Гоманг хийдийг байгуулжээ. Одоогоор нийт 5000 орчим ламтайгаас Монголоос 150 орчим лам суралцдаг бөгөөд 16 жил сурч төгсдөг энэхүү сургуульд Буддын гүн ухааны 5 боть судар судалдаг ажээ. Энэхүү 5 ботийг Шүн хэмээн төвдөөр нэрлэдэг ажээ.

Шүншиг гэдэг нь Бурханы дүрийг орлуулж буй баримал, зураг зэргийг тарнидан бурханы хутагийг шингээж буй нэг ёс гэж тайлбарлах болов уу. Ахын хэлсэн үгээр бол Шүншиггүй бурханд юу ч орчихож болно. Чөтгөр ч шүгэлж болно. Яг үүнтэй адилаар Шүн буюу шашныхаа гүн гүнзгий утга санаа философийн номлолыг ойлгоогүй лам хүн мөн чөтгөр шиг аашилж ч болох ажээ.

“Лам болж байгаа хүмүүс сүсэгтнүүдэд гүрэм дором хийхийг өөрийнх нь хийх ёстой ажил гэж ойлгосон байдаг нь манай шашны хамгийн том завхрал болоод байна. Угтаа лам хүний хамгийн түрүүнд хийх ёстой ажил бол шашныхаа ном судрыг уншиж утга санаа бүрийг нь ягштал ойлгох юм. Үүний хажуугаар зовж зүдэрсэн, итгэл хайсан сүсэгтэн түмэнд бүр аргагүйдсэн үед л элдэв засал гүрэм хийж ном уншиж өгөх ёстой юм” хэмээн лам ах 1500 орчим километрийг туулах 30 цагийн аялалын явцад өгүүлж байлаа...

Уг нь цааш жаахан юм бичмээр байсан ч өөрийн эрхгүй нүд анилдаад дээрээс нь Обамагийн тангараг өргөх ёслол www.cnn.com дээр цагийн зөрүүгээр яг гарч таараад сэтгэл санаа хоёрдуулаад байна. Дараа жаахан сэргэг үедээ үргэлжлүүлье

6 comments:

Док said...

Зөвхөн лам нар тэгж бодоод зогсохгүй хамгийн хортой нь манайхан бурхны шашин шүтдэг гэдэг боловч үнэндээ ламд очиж мөнгө өгч ном уншуулахаас өөр юм мэддэггүйд байх шиг. Номын утгыг ойлгоод номонд сүсэглэх биш ламд мөнгөө өгч ламд залбираад л гардаг байдлыг мухар сүсэг гэмээр ч юм шиг.
Үргэлжлэлийг нь хүлээж байя.
Амжилт.
Аан бас, жилдээ нэг удаа хамаг бүхнийг хаяад явж толгойгоо сэргээдэг чинь ч ёстой сайхан амралт болж байгаа даа...

Э. Баярсайхан said...

Монголд ч мухар сүсэг л болоод байна даа.
Үргэлжлэлийг чинь хүлээж байгаа шүү.

Н.Цэцболд said...

Сайхан нийтлэл байна. :)

A.Амарсайхан said...

Үргэлжлэл хэрэгтэй байна аа. Манайд харин шүнтэй лам байдаг болов уу? Ном уншиж байхдаа л, хүний өгч байгаа мөнгө рүү хялан хялан хараад л. Яах аргагүй бизнес ээ, бизнес.

Pearle Deppsu said...

Манай лам нар ч алж өгдийн байнаа. гүй ээ лам нар бишээ, лам хүний хувцас өмссөн залуус

TuyaM said...

Их сайхан нийтлэл байна. Яг үнэн. Ер нь монгол лам нар юу ч мэддэггүй. Бас баримталдаг ёс жудаг гэж байдаггүй. Хүмүүсээ бурханаа шүт, гэхдээ монгол ламыг шүтэх хэрэггүй байхаа!!!